Në një ngjarje historike për Forcat e Armatosura të Shqipërisë, helikopterët UH-60A+ Black Hawk fluturuan për herë të parë me pilotë shqiptarë. Ky moment shënon një hap të rëndësishëm në modernizimin dhe forcimin e kapaciteteve ajrore të vendit tonë.
Pilotët, teknikët e fluturimit dhe personeli i mirëmbajtjes së Forcave të Armatosura (FA) u certifikuan për të kryer detyrat e tyre pas përfundimit të fazës së parë të trajnimit nga instruktorët amerikanë të ekipit SATMO. Tetë pilotë dhe tetë specialistë të mirëmbajtjes janë kualifikuar në profile teknike të ndryshme, duke përfshirë linjat, motorët, strukturën dhe avionikën.
Helikopterët e parë UH-60 Black Hawk mbërritën në Shqipëri në janar të këtij viti, si pjesë e një porosie të mbështetur nga mbi 50 milionë dollarë fonde ndihme nga SHBA. Këto helikopterë të rinj do të ndihmojnë në forcimin e kapaciteteve të Forcave Ajrore të Shqipërisë dhe aftësinë për të kryer evakuime mjekësore, rikuperime personeli, misione kërkim-shpëtimi, si dhe për të mbështetur lëvizjet logjistike të NATO-s për operacione dhe stërvitje.
Nënkolonel Ervin Buzi ka kryer përparimin operacional për të kryer transportin e trupave, duke përfshirë menaxhimin e emergjencave dhe fluturimin me instrumente në kushte të vështira meteorologjike. Ndërsa Major Klajdi Tushe ka kaluar fazën e menaxhimit të emergjencave dhe fluturimit vizual dhe do të vazhdojë me fluturimin instrumental.
Kjo arritje është një dëshmi e bashkëpunimit të ngushtë strategjik midis Shqipërisë dhe SHBA-së dhe një hap i rëndësishëm drejt modernizimit të Forcave Ajrore Shqiptare. Helikopterët Black Hawk do të luajnë një rol kyç në përmirësimin e kapaciteteve operacionale dhe në mbështetjen e misioneve të ndryshme të sigurisë dhe emergjencave.