Aktori i njohur Agron Llakaj ka postuar një video falenderimi për të gjithë njerëzit që e mbështetën pas humbjes së bashkëshortes së tij. Ai shprehet se, në pamundësi për t’i kthyer përgjigje të gjitha mesazheve, ka zgjedhur të ndajë një mesazh falenderimi dhe mirënjohjeje të thellë për çdo fjalë zemre që ka marrë. Llakaj thekson se edhe gëzimet edhe hidhërimet ndahen me njerëz e me miq, dhe se pjesmarrja e njerëzve në përcjelljen e lamtumirës së Kostandinës dhe në ditët e pritjes që familja e tij organizoi ka bërë që dhimbja të kalohet disi më lehtë. Ai gjithashtu foli për betejën e Kostandinës me sëmundjen dhe forcën e saj, duke theksuar se të bësh humor me thikë në zemër është e vështirë, por motivi ishte Kostandina. Llakaj përfundon me një thirrje për dashuri dhe respekt ndaj njëri-tjetrit, duke theksuar se pasuria më e madhe që Zoti mund t’ju jap është shëndeti.
Ja fjala e plote e Agron Llakaj:
“Në pamundësi për t’i kthyer përgjigje të gjitha mesazheve me rastin e humbjes së njeriut tonë të shtrenjtë, Kostandinës sonë dhe Kostandinës time. Po ju drejtohem me këtë video mesazh falenderimi dhe mirënjohje të thellë për çdo fjalë zemre drejt nesh nga ana juaj. Edhe gëzimet edhe hidhërimet ndahen me njerëz e me miq. Moria e njerëzve në përcjelljen e lamtumirës së Kostandinës dhe në ditët e pritjes që familja jonë organizoi na bëri ta kalonim disi më lehtë.
Mali i dhimbjes që Kostandina la pas nuk ka fjalë që mund ta shpreh. Pesha është shumë e madhe. Pikërisht për shkak të kësaj dhimbje ne po pranojmë vuajtjen. I kam lexuar shumë nga mesazhet tuaja, për të ruajtur kujtimin e saj. Ne nuk do ruaj kujtimin e saj sepse ajo është në çdo frymëmarrje tonën. Jetën nuk e zgjedhim, e tillë është.
Në dy vite Kostandina tregoi se jo thjesht ishte shtylla e shtëpisë, por ishte dhe njeriu me karakterin më të fortë. Në këto dy vite, në këtë tragjedi njerëzore, në këtë betej me një sëmundje të pamëshirshme, ishte ajo që më dha mundësinë të ushtroja profesionin tim. Të bësh humor me thik në zemër është e vështirë. Motiv ishte Kostandina. Sëmundja doli më e fortë. Shpresoj që atë që Kostandina la pas, fëmijët e mi ta trashëgojnë. Dashurinë e madhe njerëzore, respektin mbi gjithçka.
Dua të them shumë. Por i prekur dhe i emocionuar nga pjesmarrja e të gjithë njerëzve, dua të shpreh falenderimin e madh, mirënjohje dhe t’ju them duajeni dhe respektojeni njëri-tjetrin. Pasuria më e madhe që Zoti mund t’ju jap është shëndeti. Çdo gjë tjetër është shumë e vogël. Paçi ditë të gëzuara me shëndet dhe zemrat plot! Respekt dhe mirënjohje nga unë personalisht, fëmijët e mi, mbesat dhe nipërit. Faleminderit me zemër.”