Një përplasje fatale kokë më kokë midis dy trenave në Greqinë qendrore ishte kryesisht për shkak të “gabimit tragjik njerëzor”, tha të mërkurën kryeministri grek.
Sipas zyrtarëve grekë, të paktën 38 persona humbën jetën në aksident dhe dhjetëra të tjerë u plagosën. Përpjekjet e shpëtimit janë ende duke u zhvilluar për të gjetur të mbijetuarit.
Zëdhënësi i Shërbimit Grek të Zjarrfikësve Vassilis Varthakogiannis tha se të paktën 38 persona u vranë dhe se nga 72 të plagosur, 57 mbetën në spitale. Gjashtë prej tyre janë në terapi intensive.
Një tren pasagjerësh që transportonte më shumë se 350 persona u përplas me një tren mallrash pak para mesnatës me orën lokale pranë qytetit të Larisës, rreth katër orë në veri të Athinës, tha një zyrtar.
Një menaxher stacioni u arrestua. 59-vjeçari u akuzua për vdekje masive nga pakujdesia dhe shkaktim i lëndimit të rëndë trupor nga pakujdesia, tha departamenti i policisë së Larisës.
Ndërkohë, në qendër të Athinës shpërthyen përleshjet midis protestuesve dhe oficerëve të policisë jashtë selisë së kompanisë hekurudhore greke, Hellenic Train, pas thirrjeve për demonstrata.
Përplasja ka ngritur pikëpyetje rreth historisë së dobët të vendit për sigurinë hekurudhore. Nderkohe dhe ministri i transportit dha dorëheqjen, duke thënë se sistemi hekurudhor që trashëgoi qeveria nuk ishte “në përputhje me standardet e shekullit të 21-të”.
Kryeministri grek Kyriakos Mitsotakis u zotua më herët të mërkurën për të zbuluar se çfarë shkaktoi një përplasje treni pranë qytetit të Larisës që la të paktën 38 persona të vdekur dhe dhjetëra të plagosur.
“Është shumë e vështirë ajo që po përjetojmë sot si vend. Ne po flasim për një tragjedi të patregueshme”, u tha Mitsotakis gazetarëve gjatë vizitës së tij në vendin e rrëzimit. “Një gjë mund të garantoj: ne do të zbulojmë shkaqet e kësaj tragjedie dhe do të bëjmë gjithçka në fuqinë tonë për t’u siguruar që kjo të mos ndodhë më kurrë.”
Kryeministri grek tha se mendimet e tij janë “para së gjithash me të afërmit e viktimave” dhe shtoi se detyra e vendit është të trajtojë të plagosurit dhe të identifikojë të vdekurit.