Në prag të ndeshjes së rëndësishme të Nations League kundër Spanjës, Zvicra do të përballet me një mungesë të madhe në formacionin e saj. Granit Xhaka, kapiteni dhe një nga lojtarët më të rëndësishëm të ekipit, nuk do të jetë në fushë për shkak të kartonit të kuq të marrë në ndeshjen kundër Danimarkës.
Trajneri i Zvicrës, Murat Yakin, e ka pranuar se mungesa e Xhakës është një goditje e madhe për ekipin, por ka theksuar se ai do të jetë një lider i rëndësishëm në dhomat e zhveshjes. “Xhaka do të jetë me ne, pasi menjëherë bëri me dije se dëshiron të jetë në skuadër, por edhe në dhomat e zhveshjes për ndeshjen ndaj Spanjës. Kjo tregon madhështinë e tij,” tha Yakin në një konferencë për shtyp.
Yakin gjithashtu theksoi rëndësinë e lojës së guximshme dhe intensive që Zvicra do të zhvillojë kundër Spanjës. “Loja jonë do të jetë e guximshme dhe për bazë do t’i marrim ndeshjet në Kampionatin Evropian. Do të luajmë në shtëpi, në stadiumin e mbushur plot. Do të luajmë futboll intensiv, jemi mësuar me këtë. Kjo kërkon shumë vrapim, duele, dhe për shkak të pasimeve të shumta të Spanjës, duhet të jemi të fokusuar,” shtoi ai.
Pavarësisht mungesës së Xhakës në fushë, prania e tij në dhomat e zhveshjes do të jetë një burim i madh motivimi për ekipin. Lojtarët e tjerë do të duhet të ngrihen në nivelin e sfidës dhe të japin maksimumin për të kompensuar mungesën e kapitenit të tyre.
Foto nga Google Images