Sicili, 19 Gusht 2024- Një jaht luksoz me 22 persona në bord u mbyt në brigjet e Siçilisë gjatë një stuhie të ashpër në orët e para të mëngjesit të së hënës. Ndër të zhdukurit është edhe sipërmarrësi i njohur britanik i teknologjisë, Mike Lynch.
Jahti, i quajtur “Bayesian”, u përmbys rreth orës 5 të mëngjesit pranë Palermos, Siçili, pas një stuhie të fuqishme që përfshiu rajonin. Sipas burimeve, jahti kishte një gjatësi prej 56 metrash dhe ishte ndërtuar nga kompania italiane Perini Navi në vitin 2008.
Në bord ishin 22 turistë të huaj, përfshirë britanikë, amerikanë dhe kanadezë. Deri tani, 15 persona janë shpëtuar, përfshirë gruan e Lynch, Angela Bacares, dhe një vajzë njëvjeçare. Fatkeqësisht, një person ka humbur jetën dhe gjashtë të tjerë janë ende të zhdukur.
Autoritetet italiane kanë nisur një operacion të madh kërkimi dhe shpëtimi, duke përfshirë helikopterë dhe anije shpëtimi nga rojet bregdetare, karabinierët, shërbimi i zjarrfikësve dhe shërbimi i mbrojtjes civile. Një hetim është hapur nga prokurorët në qytetin e afërt të Termini Imerese për të zbuluar shkaqet e incidentit.
Mike Lynch është një figurë e njohur në botën e teknologjisë, i njohur për themelimin e kompanisë Autonomy Corporation dhe për kontributet e tij në fushën e inteligjencës artificiale dhe analizës së të dhënave. Zhdukja e tij ka tronditur komunitetin e biznesit dhe teknologjisë në mbarë botën.
Foto nga Google Images