Me rastin e përvjetorit të Besëlidhjes së Lezhës, më 2 mars 2025, u zbulua shtatorja e re e Gjergj Kastriotit Skënderbeu përballë vendvarrimit të tij në Lezhë. Ky moment historik shënon 581 vjet nga Besëlidhja e Lezhës, një ngjarje e rëndësishme në historinë shqiptare ku fisnikët shqiptarë u bashkuan për të luftuar kundër Perandorisë Osmane.
Në ceremoninë e zbulimit të shtatores morën pjesë figura të rëndësishme politike dhe kulturore, përfshirë Presidenten e Kosovës, Vjosa Osmani, dhe kreun e Bashkimit Demokratik për Integrim (BDI) në Maqedoninë e Veriut, Ali Ahmeti. Presidentja Osmani theksoi rëndësinë e unitetit kombëtar dhe nevojën për një qasje të përbashkët dhe një vizion afatgjatë për të forcuar rolin e shqiptarëve në rajon dhe në botë.
Gjatë fjalimit të saj, Presidentja Osmani tha: “Sot pas më shumë se 5 shekujsh, historia na mëson se uniteti kombëtar nuk është thjesht një koncept i së kaluarës, por një domosdoshmëri për të tashmen dhe të ardhmen tonë.” Ndërsa Ali Ahmeti shtoi: “Le të na shërbejë edhe Lezha edhe Kruja. Kruja për rezistencë, Lezha për bashkim dhe unitet dhe për diplomaci. Skënderbeu nuk ka qenë vetëm i shpatës por dhe i politikës, i diplomacisë nga më të avancuarit e kohës”.
Besëlidhja e Lezhës u mbajt më 2 mars 1444, në katedralen e Shën Nikollës në Lezhë. Qëllimet e kuvendit ishin bashkimi i sa më shumë fisnikëve dhe principatave nga tokat që më parë në botën krishtere ishin të njohura si toka të Perandorisë së Bizantit, si dhe rimëkëmbja e Mbretërisë së Arbrit. Vendimet e kuvendit përfshinin krijimin e një Besëlidhje Arbërore në krye me Skënderbeun, formimin e një ushtrie të përbashkët të komanduar nga Skënderbeu si kapiten i përgjithshëm dhe krijimin e një arke të përbashkët për të përballuar shpenzimet e luftës.
Shtatorja e re e Gjergj Kastriotit Skënderbeu është krijuar nga skulptori i talentuar Ardian Pepa. Kjo vepër monumentale është realizuar me mjeshtëri të lartë, duke skalitur me dinjitet figurën e Heroit Tonë Kombëtar. Vendosja e kësaj shtatoreje është një akt drejtësie historike dhe një fitore ndaj harresës e burokracisë, duke e kthyer heroin tonë në piedestalin e duhur, aty ku historia dhe nderimi i përjetshëm e kërkojnë.
Gjergj Kastrioti Skënderbeu mbetet një figurë e rëndësishme në historinë shqiptare dhe evropiane. Shtatorja e re në Lezhë është një simbol i përkushtimit të shqiptarëve për të nderuar dhe kujtuar heroin e tyre kombëtar dhe për të ruajtur trashëgiminë e tij për brezat e ardhshëm.
Foto nga Google Image